RAMADHANI MAPITO

1. Muogope Mungu bosi, Ramadhani inapita     Mda wote simuasi, yupo na atakupata     Usije fanya uasi, Yeye yu hai si mata     Tumuogop...

1. Muogope Mungu bosi, Ramadhani inapita
    Mda wote simuasi, yupo na atakupata
    Usije fanya uasi, Yeye yu hai si mata
    Tumuogope Mwenyezi, Ramadhani ni mpito.

2. Watu walishika kasi, kutubia kwa matata
    Kuachana na visasi, ibada kuzikamata
    Ugomvi sisi kwa sisi, kila ovu lilisita
    Tumuogope Mwenyezi, Ramadhani ni mapito

3. Mwezi ukaribiapo, watu hutubu kwa hima
    Huacha yao michapo, na ibada kusukuma
    Ingawa wachache tupo, tusojali ya Karima
    Tumuogope Mwenyezi, Ramadhani ni mapito

4. Mungu yupo siku zote, apasa kuabudiwa
    kwa lolote kwa chochote, ndie wa kushukuriwa
    Usingoje yakupate, au mwezi kufikiwa
    Tumuogope Mwenyezi, Ramadhani ni mapito

5. Waliacha kutambika, Kisa mwezi unakuja
    Kwa muda wakaongoka, Kutatua zao haja
    Mwezi ukisha toweka, wanarudia vioja
    Tumuogope Mwenyezi, Ramadhani ni mapito

6. Yule kamwacha Rehema, kwasababu amuiba
    Imemjaa heshima, tadhani katoka SOBA
    Mwezi ukisha pogoma, wanarudia mahaba
   Tumuogope Mwenyezi, Ramadhani ni mapito

7. Kaolewa dada yetu, na yule kijana HAJI

    Kasitiri wake utu, Watoto tunataraji

    Lakini isiwe tu, kisa apikiwe uji

    Tumuogope Mwenyezi, Ramadhani ni mapito

8. Ramadhani mwezi bora, Hilo tusilikatae

    Ziwazi zake ishara, Na achume achumae

    Tupate njema bishara, Na kwa Mola tutubie

    Tumuogope Mwenyezi, Ramadhani ni mapito

9. Mwezi huu kama lulu, na ukweli ndio huo

    Lengo waja tufaulu, Ramadhani kama chuo

    Kwa kauli na FIILU, tuachane na puuo

    Tumuogope Mwenyezi, Ramadhani ni mapito

10. Mwezi ukiisha bwana, Usiyaache mazuri
     Endeleza, shikamana, Mungu atakupa heri
     Tutafuzu kwa Rabana, Tung'aze zetu kaburi
     Tumuogope Mwenyezi, Ramadhani ni mapito


Shairi hili limetungwa tar 17.06.2017 saa 10:18 jioni (Ramadhan 22 1438 - Jumamosi)

Saidi R. Bunduki