RAHA YA MAISHA IKO WAPI?

Hivi raha iko wapi?, nambieni wana kundi

Maisha haya mafupi, nadhani hayana fundi

Si orijino si kopi, si fureshi si mtindi

HII RAHA YA MAISHA, IKO WAPI WAJAMENI?

Fukara alia pesa, huamini ndipo sawa

Akipata atatesa, kila mtu tamjuwa

Tangu zama hadi sasa, bado hajafanikiwa

HII RAHA YA MAISHA, IKO WAPI WAJAMENI?

Fukara mawazo tele, usiku mang’amu ng’amu

Hata ugali tembele, kupata ni kazi ngumu

Watoto wasoma shule, hana pesa ya mwalimu

HII RAHA YA MAISHA, IKO WAPI WAJAMENI?

Mke watoto ni shida, nguo mipasuo hiha

Unaoitwa uroda, yeye kwake ni karaha

Anawaza kila muda, lini apate staha

HII RAHA YA MAISHA, IKO WAPI WAJAMENI?

Anayeitwa tajiri, sisi twamuona bomba

Mamia ameajiri, fukara na omba omba,

Kumbe yuna kisukari, kula yake ni jaramba

HII RAHA YA MAISHA, IKO WAPI WAJAMENI?

Huitwa FOGO mtata, ana magari lukuki

Mkosee ule MBATA, popote humpeleki

Du! Tarifa nlopata, Hasimami hasimiki

HII RAHA YA MAISHA, IKO WAPI WAJAMENI?

Mwenye mali hana heri, bora ulalae RAGO

Wengine mali za siri, ajuae bi mdogo

Kutwa anatafakari, Hata akikata GOGO

HII RAHA YA MAISHA, IKO WAPI WAJAMENI?

Alimpenda fulani, awe kwake ni faraja

Kumbe ye kamtamani, azikidhi zake haja

Amebaki mataani, kabaki na ngoja ngoja

HII RAHA YA MAISHA, IKO WAPI WAJAMENI?

 Aso ndowa mashakani, amechoka ubachela

Mwenza ana mtamani, apunguze kuzurula

Leo nanga zi angani, ndoa chungu tele hila

HII RAHA YA MAISHA, IKO WAPI WAJAMENI?

Hana mwana hana SUDI, mpweke anajiliza

Hospito nenda rudi, na waganga kamaliza

Bado adaiwa kodi, nyumba watamfukuza

HII RAHA YA MAISHA, IKO WAPI WAJAMENI?

Haya ni maoni yangu, msije nipatiliza

SIDE BOI jina langu, BUNDUKI la kubatiza

Pia penye lugha chungu, ushauri nasikiza

HII RAHA YA MAISHA, IKO WAPI WAJAMENI?

mtunzi
Saidi R Bunduki