USHAIRI NI KIPAJI

Ushairi ni kipaji, si kila mtu aweza

Kutoka kwa muumbaji, wachache amewajuza

Sio kama kunywa maji, au matonge kumeza

Ushairi ni kipaji, ijapo unasomewa

Ushairi ni kipaji, sio kitu cha kubeza

Cha kwanza ni upangaji, wa vina vya kuliwaza

Na ufuatiliaji, wa beti kufananiza

Ushairi ni kipaji, ijapo unasomewa

Ushairi ni kipaji, japo waweza jifunza

Lakini wapo magwiji, elimu kwake ni kiza

Kwa tungo za kufariji, na nyingine za kuliza

Ushairi ni kipaji, ijapo unasomewa

Ushairi ni kipaji, mimi nilijiuliza

Mbona kuna watungaji, shule hawajamaliza?

Unaweza kumjaji, ukawa umepoteza

Ushairi ni kipaji, ijapo unasomewa

Ushairi ni kipaji, masomo kama nyongeza

Kumpamba mtungaji, viungo kukorombweza

Kumvuta msomaji, asome na kuteleza

Ushairi ni kipaji, ijapo unasomewa

Ushairi ni kipaji, za moyoni naeleza

Na abishe m’bishaji, mimi nitajituliza

Sio ubabaishaji, na tungo zilizo viza

Ushairi ni kipaji, ijapo unasomewa

Ushairi ni kipaji, hebu rafiki chunguza

Na wala haihitaji, bongo nyingi kuumiza

Ngawa mi mropokaji, chunguza kisha nijuza

Ushairi ni kipaji, ijapo unasomewa

Ushairi ni kipaji, ila mimi ni kilaza

Mimi muungaungaji, bado najikaza kaza

Mekusudia magwiji, kama we nojiuliza

Ushairi ni kipaji, ijapo unasomewa

 Sayyid R Bunduki.