MAISHA PUNGUZA KASI

1. NGANGANGA UMETAITI, MITHILIYO NI MKANDA

    HATA MATE HAYAPITI, TASEMA PETE NA CHANDA

    WAKULILIA UMATI, WAKURUDI NA WANAKWENDA

    Maisha punguza kasi, mbona umebana sana?

2. KWELI NILIJIDHATITI, MAANA NILIKUPENDA

    NIWE MWAKO KATIKATI, NIKAIANZA KALENDA

    LEO SINA HATA KITI, SISEMI HICHO KITANDA

    Maisha punguza kasi, mbona umebana sana?

3. MAISHA UMEDHIBITI, NYANJA ZOTE ZIMEPINDA

    HATA MKATE SIPATI, WALA UGALI MLENDA

    SI ANDAZI SI CHAPATI, MAISHA MWENZI NAKONDA

    Maisha punguza kasi, mbona umebana sana?

4. KILA KAZI NI KIBUTI, MAMBO YANAGOMA KWENDA

    NIMESHACHOMA BARUTI, NIKAJARIBU KUWINDA

    MARA NIPO MTU KATI, WAMESHANITOA NUNDA

    Maisha punguza kasi, mbona umebana sana?

5. MAISHA MSAMIATI, KUFUMBUA WANISHINDA

    WATOTO NAO UMATI, WANANIFANYA NAKONDA

    BORA NILE MKUYATI, NITAFURAHI HUENDA

    Maisha punguza kasi, mbona umebana sana?

BY: bunduki.com