NITARUDI SIJAUWA

Mtunzi amekumbukwa na vijana wenzake wa kijijini kwao baada ya kuondoka kwa muda mrefu. Lakini akasema jamani ndugu zangu "Nitarudi Sijauwa"

Huenda mwanikumbuka, ndugu yenu niko hai
Sasa ni kumi miaka, Nimewapa bai bai
Bado hawajanizika, Afya tele sipo moi
Nitarudi sijauwa

Maisha yaso kanuni, sikupenda kuwa mbali
Ni mipango ya manani, Alopanga hii hali
Nimekumbuka nyumbani, hasa kupiga matari
Nitarudi sijauwa

Yaendaje michakato, Sina shaka mko vema
Bado yapita Kidato?  Ama ilikwisha buma?
Nilowaacha watoto,  Sasa ni watu wazima
Nitarudi sijauwa

Walimu pale shuleni,  sana nimewakumbuka

Sijui wapo kazini?, Mwinyipingu na Mashaka

Na vipi utamaduni, lile goma la MANGAKA

NITARUDI  SIJAUWA

Nimezimisi boribo,  msimu umeshafika?

Na omari ungarobo,  yupo au kaondoka?

Ila habari za KIBO,  ninazo nahuzunika

NITARUDI  SIJAUWA

Nasikia kumekucha, umeme ulishafika

Vipi Mahamudu kocha, Star bado yawika?

Ni muda nimewaacha, leo nimewakumbuka

NITARUDI  SIJAUWA

Kumbe sasa mambo poa, reli wameirudisha

Safari zetu za Dar, Moshi mpaka Arusha

Maana ilichakaa, kambi zote zilikwisha

NITARUDI  SIJAUWA

Msalimieni Shida, wakumuita Madaba

Nisalimieni Meda,  sijamsahau Jeba

Salamu ziwafikie.

Mpeni hai Mbonea, pamoja na Jua kali

Na Tajiri Mungu pia,  Kifudu na fundi Ali

Salamu ziwafikie.

Salamu zende kwa Ponji, Timba, babu Kanchele

Na babu Ali wa Zenji, Na Mzee Kaburule

Salamu ziwafikie.

Kafobe, Deko na Nyese, Mwetambara na Mbagurwa

Mitumba, Moshi, Chikwese,  na yule baunsa Kurwa

Salamu ziwafikie.

Hapa mwisho piga nyundo, ni mwisho natia nukta

Mpeni hai Mfundo, Basi ALLAAH ATALETA.

Salamu ziwafikie.