KILIO CHANGU

'Assalaaam alaykum warahmatullaahi wabarakaatuh' Ukiona mtu mzima analia, ujue kuna jambo Tunamshukuru Mwenyezimungu kwa ...

'Assalaaam alaykum warahmatullaahi wabarakaatuh'

Ukiona mtu mzima analia, ujue kuna jambo

Tunamshukuru Mwenyezimungu kwa kutujaalia afya njema na uhai. Mimi na wewe leo tumefanikiwa kuipata ramadhani tukiwa na afya njema wakati kukiwa na wenzetu ambao wametangulia mbele ya haki (wamefariki), kwani nao walitamani kufunga kama sisi. Tunapaswa tumshukuru Mwenyezimungu kwa kutupendelea.

siku chache zilizopita waislamu duniani kote wameanza kufunga mwezi mtukufu wa Ramadhani

LIKINI SASA DAAAH!!!.................

Kilio changu ni juu ya hali tulionayo leo kama dunia, bara, nchi, na hata kaya zetu. Janga hili ni gonjwa hatari la mlipuko la corona.

Hii imepelekea leo waislamu tunalia chini chini na mara nyingine kwa wazi wazi hata kama baadhi yetu vinywa vyetu viko kimya.

Haya ni maneno ambayo nimeongea na nafsi yangu lakini hatimaye moyo ukashindwa kunyamaza na mikono kuchukua hatua ya kukuandnikia wewe katika waraka huu.

KWANINI NALIA?

Nalia kwa sababu nilizoea kwamba - MWEZI WA RAMADHANI NI.................

1. Mwezi wa kutembeleana

Iko wapi furaha yetu leo katika kutembeleana baina ya ndugu na ndugu, rafiki na rafiki na muislamu na muislamu mwenzake? Leo waislamu tumekuwa ni watu wa kunyanyapaana kutengana na kukimbiana. Na hii si kwa sababu ya kupenda ila ni kwasababu ya Korona

Iko wapi furaha yetu, uko wapi utamaduni wetu wa kupeana mikono na kukumbatiana? 

KORONA IMETUTAWANYA

2. Mwezi wa kula pamoja

Mwezi wa kualikana futari na vyakula kem kem kula na kucheka pamoja. Masikini, mafukara, wapita njia, wasafiri na wenye haja tulikuwa tunakula nao pamoja futari nje katika jamvi. Leo tunajifungia ndani na familia zetu na kuwaacha wasafiri ambao wamekatikiwa na safari kuteseka.

Yote hii ni kwa sababu ya Korona (Covid 19)

3. Mwezi wa kuswali swala za jamaa

Ziko wapi sala tano za jamaa? Zikifuatiwa na nyiradi zetu kule kijijini kwetu baada ya sala? Nyiradi za kuomba msamaha na pepo ya Mwenyezimungu. Leo tumejibanza katika majumba yetu na kuswali peke yetu na familia zetu. 

4. Mwezi wa kukutana katika darasa za ilmu

Huenda tulitarajia kuhudhuria katika darasa mbali mbali za tafsiri ya Quran, fiqihi na masomo mengine mengi ya dini. Leo hakuna tena darasa hizi. Tulitarajia kupata faida kutoka kwa mashekhe zetu na kuuliza maswali yetu yanayotutatiza huku tukijibiwa pamoja na kucheka na kufurahi na mashekhe zetu. Kabla ya kuomba dua kwa pamoja "Rabbana nfaanaa bimaa allamtanaa"

Leo darasa zimekuwa mtihani na hatuna jinsi, tunaendelea kujifungia majumbani huku nyoyo zetu zikimlilia Allah atuepushe na janga hili.

Ramadhani imekuwa ngumu kisha ikawa ngumu tena, si kwa waislamu peke yao bali ni kwa watu wote. Unajua ni kwanini?..........

Biashara / kazi / ajira zimeyumba

Tunajua kuwa binadamu huishi kwa kutegemeana, hivyo mmoja anapokuwa amekwamisha mzunguuko wa maisha basi sote tutakuwa tumekwama. 

Leo biashara zetu zimekuwa ngumu kutokana na baadhi ya maofisi kufungwa na mashule kwa ujumla. Inafikia kipindi unakosa hata pesa ya kutumia. 

Unatamani kumpa mzazi wako, ndugu yako, jamaa yako walau shilingi elfu moja ya fungu la muhogo kwa ajili ya futari lakini unashindwa. Wakati huo huo mwenye nyumba anataka kodi yake, bila kusahau bili ya umeme, maji n.k

TUFANYE NINI?

Nikisema sijui cha kufanya nitakuwa muongo. Chakufanya kwanza kabisa ni kuendelea kumuomba Mwenyezimungu atuondolee janga hili kwani kwake yeye hakuna jambo zito.

PIA

Tusisahau kuchukua tahadhari zinazosemwa na wataalamu wetu wa afya ili tuwe salama na tuwaokoe wengine. Lakini pi tusisahau kuwaombea wenzetu ambao wametangulia mbele ya haki kwa ugonjwa huu Mungu azipe subira familia zao na awaweke pema peponi. Lakini kwa wale wagonjwa Mungu awasaidie wapone.

Nawe chukua nafasi hii  kuzungumza na watu wa karibu yako juu ya kumuomba Mwenyezimungu ILI kutuondoshea Mtihani huu bila kusahau kuchukua tahadhari kama isemwavyo.

TAHADHARI NI BORA KULIKO DAWA

Hiki kilikuwa ni kilio changu.

Ni mimi mandishi wako SAIDI R BUNDUKI.