MTUNZE MKEO (SHAIRI)

Huu ni wosia kwa wote walio oa na walio olewa. Mtunze mwenzako wa ndani kwani wa nje hawana shukurani

    

Mtunze Mkeo BADI, Malaya hana shukuru

Zitunze za ndoa HADDI, Sheria yatuamuru

Shikilia itikadi, ya Mungu usikufuru

Siendekeze malaya, hana mapenzio na wewe.

                   Tunza ndoayo Hamadi, michepuko inadhuru

Kwa nidhamu na weledi, epuka hao kunguru

Wataka wakufaidi, wakukokee tanuru

Siendekeze malaya, hana mapenzio na wewe.

Malaya hana SUUDI, kama mtoza ushuru

Anakufanya mradi, akwendeshe ka SUBARU

Maumivu ukirudi, kama mepigwa sururu

Siendekeze malaya, hana mapenzio na wewe.

       Wapo wazuri wa BODI, mithili ya mkaguru

  Utakapo bisha hodi, mwepesi kukuamuru

  Ukiingia hurudi, PIGA ASTAGHAFIRU

  Siendekeze malaya, hana mapenzio na wewe.

      Wengine waliachika, kwa tabia zao mbaya

  Kwa miaka na miaka, shauri ya umalaya

  Akikwona akutaka, akubebeshe MIWAYA

  Siendekeze malaya, hana mapenzio na wewe.

      Wakikwona una mke, wakutafutia njia

Wakupate wakuteke, mipango yako kuuwa

Wakufanyia makeke, mwisho talaka watoa

Siendekeze malaya, hana mapenzio na wewe.

Wakisha kuyavuruga, wanajisweka pembeni

Vigeregere wapiga, wakusema barazani

Wacheka wakikusaga, “MUONENI  HAYAWANI”

 Siendekeze malaya, hana mapenzio na wewe.

       Michepuko sio dili, madharaye ni makuu

Hupotosha maadili, kumuudhi alo JUU

Madhara lile na hili, kutwa kushamiri tuu

Siendekeze malaya, hana mapenzio na wewe.   

      Wengine malengo yao, kukutumia kimwili

Kwasababu walo nao, kutwa kutafuta mali

Hawakidhi haja zao, wakiwa ndani wawili

Malaya hana shukuru, zinduka mwana wa kwetu

      Wengine wataka pesa, kama hali yako shwari

Vimacho wavipepesa, wakikuona na gari

Lazima vitakutesa, usipokuwa ngangari

Malaya hana shukuru, zinduka mwana wa kwetu

       Mtunze mkeo fundi, wengine wapita njia

Watakuganda ka gundi, kama utawachekea

Usijewapa ushindi, mkeo kumkimbia

Malaya hana shukuru, zinduka mwana wa kwetu

       Shika familia yako, nje kuna mazigazi

Aliye wako ni wako, usimuone BAZAZI

 Usitafute ujiko, kwa vijike vya uswazi

Malaya hana shukuru, zinduka mwana wa kwetu

      Shikamana na wakwako, mfundishe na ujuzi

Waache waso mashiko, wafanye ni wapuuzi

Zingatia maandiko, Aloyanena Azizi

Pambana na hali yako, kwenda ukafika mbali.

Mtunzi;- Saidi Rashidi Bunduki.

Siku;- Jumatatu tarehe 09/10/2017 saa 20:10 usiku.

Ufafanuzi wa baadhi ya maneno

BADI                          :   jina la Mtu

HADDI                        :   Mipaka ya Mwenyezi mungu katika dini

SUUDI                         :   Heri

BODI                          :    Mwili

BAZAZI                        :    Mpumbavu

MIWAYA                      :     UKIMWI

PIGA ASTAGHAFIRU      :     Muombe msamaha Mwenyezi Mungu