OA 'Z'

Wosia kwa kijana wangu Mohammed S Shaban (Babu Z) Pale alipokuwa anaoa tarehe 4 / 5 / 2018

    1. Nne, tano, moja nane, bwanga lachukua jiko
      Limechoka masebene, na mambo yaso mashiko
Ubachela na ujane, hivi sasa kwake mwiko
Oa z bwana mudi, zingatia mambo haya
 
     2. Kwanza fahamu kijana, hii ndowa ni ibada
Thawabu kwa Maulana, hukuzidishia huda
Sasa wacha uvulana, mshukuru kila muda
Oa z bwana mudi, zingatia mambo haya
 
      3. Mpende mkeo sasa, wazamani potezea
Acha mambo ya hanasa, hiyo ni sumu ya ndoa
Huo mpya ukurasa, waulize wanojua
Oa z bwana mudi, zingatia mambo haya
 
      4. Na waseme wasemao, baki msimamo wako
Waache na mambo yao, mthamini mke wako
Mke ni kama mwanao, na ndie mwandani wako
Oa z bwana mudi, zingatia mambo haya
 
      5. Ndoa tamu ni mapenzi, wala sio mabishano
Umpende umuenzi, mpe mazuri maneno
Mpe mambo ya uswazi, umkande kama ngano
Oa z bwana mudi, zingatia mambo haya
 
      6. Wanawake ni wazito, kidogo uvumilie
Wana mambo ya kitoto, na hilo ulitambue
Hilo tu ni kama joto, lazima akusumbue
Oa z bwana mudi, zingatia mambo haya
 
     7. M bembeleze mtoto, asijutie kwa MUDI
Mpulize manukato, uturi pia na udi
Na pale penye uzito, mmuombe MAUJUDI
Oa z bwana mudi, zingatia mambo haya
 
      8. Ibada usisahau, mungu atakuuliza
Umeshaongeza dau, majukumu umekuza
Wacha marafiki jau, wasije kukuumiza
Oa z bwana mudi, zingatia mambo haya
 
      9. Muepushe na makundi, watamteka akili
Wako wengi hawapendi, kuliona jambo hili
Watampaka ufundi, umbea wa kijahili
Oa z bwana mudi, zingatia mambo haya
 
      10.  Mpe haki yake mwana, kwako hakufwata rede
Akitaka kumkuna, mzee amsha dude
Huyo sio dada bwana, kafuata mshedede
Oa z bwana mudi, zingatia mambo haya
 
      11. Hapo umesitirika, achana na hao mchwa
Toa haki kwa hakika, kamwe hutokuja achwa
Akija akichepuka, kung’uta panga la kichwa
Oa z bwana mudi, zingatia mambo haya
 
      12. Kuna wale mamluki, wapenda kuiba iba
Nyumbani hawabanduki, wajifanya baba baba
Ukimwona toa nduki, akisimama ni roba
Oa z bwana mudi, zingatia mambo haya
 
      13. Kumbuka wazazi posho, japo ulonayo robo
Kuna leo kuna kesho, usijifanye kizibo
Ukiipata korosho, usilisahau bibo
Oa z bwana mudi, zingatia mambo haya
 
      14. Nakufunda ndugu mudi, japo mimi sio kungwi
Nimesema makusudi, sauti iso na mwangwi
Maneno yangu saidi,ni machungu kama sungwi
Oa z mwana mudi, zingatia mambo haya
 
      15. Natia nanga bandari, geti natia kitasa
Chakufanya ukariri, neno la hili darasa
Ukiyaona shubiri, mimi nimesha kuasa
Mungu akuwafikishe, ufunge ndoa salama